Yes ka No Ka

Itu cerito Pak Long Latip
Nak tau lobe tanyo lah inyo apo disebalik ungkapan

Yes Ka No Ka.....

Lamo tak tuli, terkonang.....

Yo lamo da tak tuli, agak sibok sikik, teringek jo nak tuli, tapi tak dapek nak luang maso, suntuk sangek raso nyo. Teringek kek sekola arab dibatu satu, sekola lamo, Sharikatul Khairiah namo nyo, bangunan nyo yang prona satu maso dulu antaro bangunan yang termoga di Temolo, usoho Urang Awak dan beberapo urang lain diTemolo. Tapi malang nyo semaso mendirikan sekola baru dek kerajaan, bangunan mogah itu dirobokan untuk tapak padang bola yang budak awak Batu Satu sendiri tak lagi dapek gunokan.

Sayang sekali. Landmark Urang awak Tak ado lagi.

Terpiki jo kalau la di bagi peluang semulo, sejara itu diulang, tontu awak2 negotiate supayo, bahagian dopan tana itu kerajaan gantikan dengan dewan urang ramai ditingket ate nyo, dibawah sederet Kodai Kodai untuk urang awak meniago, bule ado foodcourt, kodai runcit, kodai jaek dan lain lain lagi.

Teringek ate tanggo sekola itu prona ado majlis abek gambau dan berpulo mala ratui agak nyo dapek bediri ate tanggo sekola arab itu.

Dibawa nyo pulo ado tompek main ilon, tompek main bola dan tompek lago spedo, topek melicinkan kuku, lawan kuku sapo bekilek

La tuo pulo raso nyo, Salam

PAJEAWAK BEBORAK DENGAN CHIEF RED INDIAN

Inyo sobuik: Ado saurang Cherokee bijak mengajau cucu cucu nyo tontang hiduik.

Kato nyo, " satu peporangan tonga belaku dalam diri ini, peporangan dahsyat, antaro duo serigalo.

Serigalo pertamo iolah takuik, marah, dongki, sedeh, tamak, nyose, angkoh, meyala diri, raso bedoso, bonci, rondah diri, tipu dayo, banggo tak menontu, gah dan ego.

Yang satu lagi pulo, iolah gumbira, sayang, harapan, kongsi, seronok, kemanusiaan, ikhlas, berbudi, akhrab, pemura, benau, penyanyang, ramah, mesra dan iman.

"Peporangan yang samo belaku dalam diri kelian dan diri somo urang"

Mereko diam, meronong, memikir dan bebrapo minit kemudian sorang bebunyi,"Serigalo mano yang monang".

Urang tuo Cherokee dengan lewo menjawab, "Yang kelian bagi makan hari hari"

Jamuan Kesyukuran KSB 3hb April 2004

Kito tuli lah sikit tontang majlis itu. Majlis itu di adokan untuk meraikan petugas petugas semaso pilihan rayo, smabe mengucapkan ribuan terimo kase kek somo. Mulo nak buek sikik ajo, nak buek jamuan teh.

Lope itu ado yang kato saki bagi duit pilihan rayo itu ado sikik lagi, nak bagi bagi pun sikik sanget, tapi kalau buek makan inshaallah dapek jo samo samo raso.

Lope itu ado pulo tambahan untuk sate, alhamdullillah, rezeki untuk somo.

Datuk Sarit, lambek sikik, dapek berito, inyo melawat urang meningge, begitu jugok Hj Hamdan. Tak apo kito tunggu. Tapi tak lah lambek sangek, dalam 8.45 inyo dah sampai. Urang kito pun dah ramai. rombongan inyo pun ramai. Dan suasano agak meriah, salam salaman, dan dokek pukul sembilan kami mulokan makan tampo YB Haji Hamdan.

Tak Apolah kito mulo dulu.

Sambe makan sanbe borak, Datuk, Nasrun sekarang buek international trade, kato Ketuo Pemudo, Qori.

"Hah, trade with OIC countries, Datuk, Jawab Nasrun".

You should go for this african country, yang petronas dah masuk, hah Sudan.

Sudan, I dah masuk tok, pajeawak sobuik, in august last year together with a group of other malaysian consortium and Ben Aweidha Group of Abu Dhabi, UAE.
Infact, we are forming a jv company MALAYSIAN ARABIA SURVEYING CORPORATION
and this one were sending a team to start our operation there.

"Yang trouble to kak south aje..."

"In Khartoum it is safe, datuk."

"The Petronas GM in Khartoum is my nephew", kata datuk.

"Oh I ade singgah jumpa Petronas Personel, di Holiday Villa, Khartoum."

Infact we had Dinner at Ali Bashir's house, the brother of the President, Omar Bashir.President had some part of his military training in Malaysian military academy."

Lope itu haji hamdan sampai, dan makan dah makan ado ucapan sikik, Pajeawak berucap, Datuk berucap, Hj. Hamdan berucap lope itu Along Jah, tuan Rumah,

Sudah itu, "Datuk saya ade cenderemate sikiek, bole, datuk tak angkat sumpoh lagi."

"Ah, itu boleh, tapi sijil tu ketua cawangan saja boleh settle."

Okay, cenderamate berbontuk frame yang di dalam nyo ade tetuli berikuik,
___________________________________________________________
WASIAT RASULLULAH


PENYAKIK BECAKAP ADOLA BEBOHONG
PENYAKIK ILMU ADOLA LUPO
PENYAKIK IBADA ADOLA RIAK
PENYAKIK BUDI PEKERTI ADOLA MEMUJI DIRI
PENYAKIK BERANI ADOLA GANE
PENYAKIK PEMURA ADOLA BOROS
PENYAKIK BERPANGKEK ADOLA BANGGO DIRI
PENYAKIK MALU ADOLA LOMA/MUNDO
PENYAKIK MULIO ADOLA MENONJOL DIRI
PENYAKIK AGAMO ADOLA HAWO NAFSU
PENYAKIK KAYO ADOLA KEDOKUIK


tulus ikhlas
dari umno kuala semantan barat
dun semantan
parlimen temerloh



logo______________peta_____________logo
umno____________temeloh__________pahang



_______________________________________________________

Yang bes nyo datuk sporting dan menbaco nyo
dalam loghat awak
walau pun merangkak rangkak

"macam urang minang ajo, bunyi nyo", komen sesaurang...


"Congratulation datuk, you passed..."

and YB Hj Hamdan, congratulations"

GOOD EVENT.

KALAU NAK SONANG,

KATO BANG DIN CHAK......

KALAU NAK SONANG,
BESUSA SUSA,

KALAU NAK SUSAH,
BESONANG SONANG


Dapek pado malam sabtu,
majlis kesyukuran UMNO CAWANGAN KUALA SEMANTAN BARAT
dokek umah along jah.

MAJLIS KESYUKURAN KSB

UMNO KUALO SEMANTAN BARAT
MENJOMPUIK KELIAN KELIAN
KE MAJLIS KESYUKURAN
DI RUMAH ALONG JAH
PADO JUMAAT MALAM SABTU
ADO SEMAYANG MAGRIB DAN ISYA
DAN LOPE ITU MAKAN
KATO NYO ADO SATE BAGAI...

DATUK SARIT DAN YB HJ MEDAN DIJANGKO DATANG.

YAKIN
Ado surang buto dudok ate tanggo bangunan dengan tupi inyo dikaki dan sekoping kerote yang betuli:

"Aku Buto, tolong bantu".

Saurang pakar iklan berjalan lalu dan beronti sambil dengan kesian menengok urang buto ado beberapo sen ajo dalam topi inyo. Inyo pun menambah beberapo sen lagi dan dengan tidak memintak keberanaran, di tebalikkan dek inyo kerote itu dan menuli sesuatu di ate kerote itu dan pegi.

Potang iti pakar ini balik dijalan yang samo dan ditengok nyo topi urang buto ini ponu dengan duek ringgit dan sen.

Urang buto ni kone bunyi jalan urang itu dan betanyo kalau kalau inyo lah urang yang menukau apo yang tetuli ate kerote inyo, dan nak tau apo yang dituli.

Kato pakar itu:

"Tak ade apo yang tak botoi,
" Aku cumo ubah apo yang awak tuli".
Inyo sonyum dan pegi.

Urang Buto itu tak dapek tau tapi kerote tando inyo sekarang betuli:

"SEKARANG ADOLAH MUSIM BUNGO
TAPI AKU
TAK NAMPAK PUN".
Tukau strategi kelian kalau keadaan sekarang tidak menyebelahi kelian.
Mungkin itulah yang terbaik untuk kelian.

Yakinlah setiap perubahan adolah yang terbaik intuk kito.
***HANA***

Perjalanan Part 1

Mungkin elok jo di tuli Perjalanan Perjalanan iduik ini supayo dak ilang begitu ajo. Banyak yang datang dan pergi tapi tidak dituli. Kalau dipikirkan perbedoan antaro makhlok makhlok Tuhan sebonau nyo tak banyak, melainkan kebolehan manusio menurunkan pengajaran dari perjalanan iduik inyo dari satu generasi kepado generasi setorui nyo. Itu ajo. Kadang kadang terpikir jo, kok nanti urang kato awak nak gah pulo, tapi lantak lah, asal niat awak botoi.

Jadi nak dudok kojap, monung balik, tompek tompek yang dah sampai dek paje iko. Kemano inyo dah sampai setakek ini. Brunei, Singapore, Indonesia, Thailand, Vietnam, Philipina, Papua New Guinea, Australia, New Zealand, Amerika Syarikat, Canada, Mexico, England, Wales, Arab Emirates, Sudan, Hongkong, itu yang teringek buek maso ini. Ado jo lagi, Taiwan, Korea, dan Jopun tapi cumo singga kojap.;-)

Bule kato OK jo lah, setaket ini, inshaallah akan ditambah jo lagi.dulu,

Brunei lah kito mulokan dulu, Sebonaunyo ke Brunei ni hanyo sejak kebelakangan ini.

Semaso krojo dengan Asean Institute of Forest management Brunei macam mano tertingge dari tompek tompek yang pegi.

Jadi semaso ado krojo diLabuan, dan kebetulan bawak Amak, Umi, Raha dan keluarga melawat Brunei, kami telah menaiki Bot Laju ke Brunei. Sampai di seborang, naik Teksi kami round brunei dan lawat tompek tompek inyo, dan balik Jugak potang itu.

Korap kesanun sejak dijompuik untuk membuek usoho samo dengan ahli perniagaan Brunei untuk merobuik peluang dalam e-Govt project inyo lobeh kurang setahun suda. Banyak jo da tender yang masuk di sano tapi olun satu yang berhasil. Bukan dek apo tapi dek urang sano ni agak lambek jo membuek keputusan.

Disanun semo tender masuk ate namo SEPAKAT STAR (ITC) BRUNEI yang pado mulo diterajui dek Pehin Hj Muslim. Inyo ni bekas Ketuo Risek Brunei dan disanun kami dikonekan kepado Kol (B) Nasir, Pengiran Ramli, Wong, Lai, George dan lain lain kenalan perniagaan.

Yang berio sangek ditunggu disanun iola tender E-MAPS sebab inyo selari dengan apo yang awak buek disini.

Beberapo presentation telah dibuek dan dari segi teknikal; nyo awak mempunyai banyak kelebihan dari urang urang lain yang masuk. Bukan sekali senun. korap sangek, tapi belum ado rezeki lagi, setakek ini.

Mungkin jugo akan ditubohkan satu sharikat usohosamo disanun tak lamo lagi.

Inshaallah.

Salah satu routine pajeawak iko iolah menghadiri perjumpaan bulanan TEE2. TEE adola singkatan The Emerging Entreprenuer dan sebulan sekali kali kami bermesyaurat. Bulan ini kami bermesyuarat dokek Phileo Damansara.

Pesroto TEE2 dah tinge 8 urang. Misrun, yang menjadi chair, berharok ado rujukan untuk calun tambahan yang bule diajak.

Sessi TEE biasonyo dimulokan dengan members update, dimano setiap ahli diminto membagi rating Peribadi (0-5) dan Perniagoan (0-5). Lope itu surang demi surang dikehendaki menjolekan ngapo angko itu dibagi.

Misalnyo surang bagi 2.5 - lope itu inyo jolekan sebab masaala pekerje mase olun selosai. Satela sodo dah suda kami pinda keagenda keduo.

Setiap urang di bagi seholai krote pute.

Kelian bahagi krote kepado tigo bahagian.

Bahagian pertamo tuli tajuk berikuik

STOP

Bahagian kedua

CONTINUE

Bahagian ketigo

START


Jadi kalau dalam kerote itu inyo lobe kurang begini.

!.............STOP.................!.........CONTINUE.............!............START............!
!.........................................!........................................!.......................................!

Dengan mengunokan borang macam iko. sesaurang bule menilai semulo sesuatu situasi untuk menjadikan situasi lobe elok. Ronung keadaan, lope itu pikirkan aktiviti altiviti yang patuik di kategorikan somoado stop, continue atau start.

Kami sebagai contoh nyo telah menilai pencapaian kumpulan tee kami, apo yang prolu kito toruikan, apo
yang patuik hontikan dan apo yang ulon dibuek yang patuik dimulokan.

Sesudah itu sorang demi sorang membacokan list inyo yang chair catitkan.

Rumusan dibuek dan ionyo akan menjadi guideline untuk dijalankan.

Agenda ketigo iola satu presentation ringkas oleh saurang consultant bernamo Tee Lay Peng totang apo yang di cari dek bank semaso kito memohon faciulities.


FUND RAISING

How to prepare a Good Business Plan?
Clear Businesss direction
Market size-Opportunities
Know your Competitors and Customers
Understand business threats both internally and externally
Resources Allocation
Management Competency
Fund management
Systems and methods

What are the information that the bankers look for?
Cash Flow
Commitment
Capital
Collaterals
Character

Agenda setorui nyo iolah Perbincangan tontang retreat yang dicadangkan. pado mulo kami telah merancang untuk ko Medan, tapi satelah mendongau cerito urang yang baru baliok dari vietnam, ado pulo yang syorkan ke sanun. Pajeawak olah keVietnam, tapi satelah diundi persetujuan iola untuk ke Vietnam bulan onam ini.

Akhe sekali kami membuek evaluasi perjumpaan hari ini, totang apo yang elok dan apo yang kurang elok. PLUS DELTA AND MINUS DELTA.

Kami besurai untuk makan malam dan borak borak sampai pukul sembilan malam.

Kato kato hikmah

Inyo yang membuek awak marah sebonaunyo menguasai awak

Belagak kayo buek kito jadi papo

Si miskin sedeh sebab inyo tak bekasut sehinggo inyo jumpo urang tak bekaki

Urang bijak bukan urang yang tau segalo serobi tapi urang yang
bijak iola urang tau apo yang manfaat.

bukan prolu tau somo tapi cukuik la tau yang berfaeda

SMS DARI DATUK SARIT 0199553888
23/03/2004 10:37:00pm


AWAL TQ VERY MUCH.
U ALL HAVE DONE A GOOD JOB. SYABAS

Kadang kadang hak kenek macam iko pun tinggi nilai nyo

Hari malam 21 mach malam sejarah bagi pajeawak iko.
Siang tadi Pilihanrayo diadokan.

Buek pertamo kali dalam sejarah pilihan rayo
UMNO temolo tela mengadokan sistem kiro undi tidak rasmi mengguno komputer.

Pajeawak iko tela di lantik sebagai timbalan pengerusi
bilik gerakan jentera pilihan rayo peringkat parlimen

Jadi sebagai satu pembaruan
awak bangunkan satu sistem kiroan web based
untuk mengiro jumla undi peringkat parlimen dan dun.

Tapi apobilo awak tengok kestabilan line internet di bilik gerakan UMNO
awak tukau plan B.

Plan B iola menggunokan spreadsheet dengan EXCEL.

Atan dan beberapo gadi dari putri umno samo ustaz fairuz dan chegu azmi
dijadikan jentera untuk menerimo jumlan undi BN, undi PAS dan undi Rusak
dari sulan saluran poti undi.

Aso datang keputusan, inyo direkkan dan dimasukan dalam speadsheet.

Awak jadi command in chief...

Datuk sarit kato sonang boti yo tak paya kiro kiro lagi..

Urang awak ye.

Nasib baik kesomo yang awak monite monang, kalau kalah omu jo nak lari.

bang medan, monang,

datuk sarit monang

yb shakar pun monang

chua pun monang...

cumo saluran saluran dari dun mentokab kurang melapur...

maso itu datuk sarit dah ado majoriti tujo ribu lobe

dan mentokab kato inyo ado majoriti hampir tigo biru.

Jadi kiraan pun dihotikan sebab awak tau awak dah monang

Masuk bilik chegu amee, ado nasi bungkui, makan la dulu....
sensorang.

suda itu besiap la balik ruma adik

ambik Ara dan anak anak,
kami pun betulak balik ke kelumpo
senyum bosau,
sebab tugas selosai.

CONSIDERED DONE.

Dipahamkan keputusan mutamat hanyo di umukan pukul 4.00 malam,
maso itu awak la nyongap tidu.

Sekarang Musim Mengundi, 21 haribulan 2004 ini ,
urang akan turun mengundi,

Pado 13 haribulan baru baru ini
namo untuk calon Barisan Nasional
tela diumumkan.

Sapo, Hj. Hamdan Sudin tu?

Inyo ni lamo botoi dengan UMNO.

Inyo urang yang tak sorek sorek walaupun bermacam ranjau dan liku terpakso dihadapi inyo selamo bejuang dalam UMNO.

Tapi ketetapan Tuhan pasti totap belaku.

Kali ini namo inyo naik.

Teperanjek basau urang urang yang samo samo mencalunkan namo.

Kelian nak tau apo rahsia urang tua, abang awak, ini?

D U I T.


Yo, Rasio Bang M edan adola DUIT.

Bukan bukan DUIT itu, tapi duit ini.

D Doa

U Usaho

I Istikomah

T Tawakkal.

ITU RASIO KEJAYAAN YANG HARUI
KELIAN PAHATKAN DEDALAM JIWA KELIAN.

Bukan nyo isok, hilang begitu ajo.

Rahsio duit ini abang dapek diBRUNEI.

Pengiran Ramli, yang bagi.

Jadi ingek kan lah rasio ini untuk mencapai citro cito kelian.

Satu lagi yang dapek dari Pengiran Ramli iola
apobilo kito dibagi apo apo tugasan

Sobuik rangkapan ini kepodo yang menyuruh....

"CONSIDERED DONE!!!"

ingek

"CONSIDERED DONE"


Jadi urang yang menyuruh tadi tak prolu pikir pikir lagi,
inyo tau kalau inyo bagi awak apo apo
Inshaallah tuge itu akan awak bereskan.

Jadi inyo tak prolu risau risau lagi
Sonang inyo.
Lain kali inyo tidak akan teragak bagi tuge yang lobe borak dan mencabar

Barula kelian BEJAYO

Semaso di hutan belantaro lobe kurang 100 tahun dulu dalam perjalanan untuk ke Pahang dari Kodah, belaku perbualan berikuik.

"Tuan, ala bebunyi cibok tu, Tuan." kato si isteri kepado suami inyo.

"Caklah, bunyi inyo ajo di obe, Bunyi ambo olun inyo obe" jawab nyo sang Suami.

cibok = harimau,

cak lah =biarlah

olun = belum

Urang cerodiok, tau yang somo makhlok hiduit atau mati,
menyomba Allah Subhanahuataala.

Tidak ado apo yang akan belaku di seluro sekelian alam ini
tampo keizinan Inyo. Tunduk inyo, dan persorahan inyo
kepado Illahi. Ini membulehkan inyo langsung tak ado
perasaan takuik kepado sesiapo atau kepado apo apo
melainkan Allah Subhanahuwataala.

Ini membontuk personaliti yang konte dan toguh.

Inyo tau segalonyo didalam gongaman Allah,
perangai inyo terhadok urang lain atau keadaan keadaan lain
bukan lah sonang di uba uba.

Inyo berusoho untok mendapek kelulusan
dan keizinan Tuhan dan bukan nyo kelulusan
atau keberanan makhlok lain,
inyo tidak beganjak pado peri laku inyo
untuk kepentingan diri inyo.

kore dalam bonau.


Kebetulan nyo Sang isteri bernamo Kalsom
Sang suami pulo bergolau Abdulla Paduko Bagindo.

Ke Pahang untuk membuka lombaran baru dalam hiduik inyo.

Kabau nyo diPahang ado Hassan
abang nyo si Kalsom, yang telah menotap terlobe dulu diBangau,
Kualo Semantan.

Hassan ni pulo, kalau indak obe
adola ayah kepado Pak Chak
yang anaknyo ialah Rodiah,
Abang Zainudin, Roslan, Basir,
kak Ani, dan Sudirman.

Ingek kelian Sudirman?


Anak Bang Din pulo antaro lainnyo
ialah Chegu Azmi, dan kombaunyo Li.

Isteri Pak Chak dulu ialah
Wakil Raayat Wanita Pertamo dinegaro ini.
Nasib inyo inyo meningge agak copek...

INI DI BAGI DEK IPIN JAALI MALAM TADI.

ELOK SEBAU NI, KATO INYO.

MUDA MUDA MENDAPEK PENGAJARAN, KATO IPIN,

HOK OO, KATO TOKCHU SEPUL.


WASIAT RASULLULAH
KEPADO SAIDINA ALI BIN ABI TALIB.

PENYAKIK BECAKAP ADOLA BEBOHONG
PENYAKIK ILMU ADOLA LUPO
PENYAKIK IBADA ADOLA RIAK
PENYAKIK BUDI PEKERTI ADOLA MEMUJI DIRI
PENYAKIK BERANI ADOLA GANE
PENYAKIK PEMURA ADOLA BOROS
PENYAKIK BERPANGKEK ADOLA BANGGO DIRI
PENYAKIK MALU ADOLA LOMA/MUNDO
PENYAKIK MULIO ADOLA MENONJOL DIRI
PENYAKIK AGAMO ADOLA HAWO NAFSU
PENYAKIK KAYO ADOLA KEDOKUIK

Abah part II


Anak Sungai Payo Kecik banyak kenangan bagi pajeawak ini. Anak sungai ini pangkel nyo di Payo Bosau, dan berkualokan Sungai Semantan. Di sungai ini banyak membagi pengajaran tontang erti hiduik ini. Disitulah
antara tompet paje ini belajau apa itu susah, apo itu sonang.

Maso itu kami sekeluarga sangek susah, jadi untuk mengatasi keadaan, bolum subuh lagi, kami beduo, Aba dengan pajeawak ini bangun sebolum subo dan menyelusui somak somak satelah turun dari jambatan di ate Bukit Kepayang.
Kami menghulu ikuik sungai ke arah Payo Bosau, dengan seluar basah
dan memikui jalo. Ditompek tompek tertontu, Aba akan tebau jalo, dan biarkan jalo turun, sambik meraso garik ikan.

Paje ini bawak bakoi, diam diam, menunggu, menengok, gerak jalo. Pelan pelan jalo ditarik,dan dirabo dalam golap itu, kalau ado ikan. Ikan kopau, belido, dan ruan antaro yang biaso. Kadang kadang cuma sampah ajo. Ikan dipogang di masukan ke boke ikan. Ado maso telope balik ke sungai, tak adek rezki namo nyo tu. Lopeh tu kami jalan lagi.

Tebau lagi, dapek ikan suko. Tak dapek sede, sampai di Payo Bosau, Aba turun sampai tompek tebau, Aba tebau.

Anak Sungai Payo Kecik lalu dokek kampong Payo Kecik selalunyo tak lah dalam tapi ruponyo kalau lopeh hujan ia jadi dalam. Jadi pado satu hari selopeh hujan ingaek sungai macam biaso paje ini torui trojun kedalam sungai, macam biaso ape lagi tengolamlah. Dalam keadaan tercungak cungak nasib baik amak ado samo samo ditopi sungai. Inyo trojun dan ditarik deeh rambuik dan serek eh sampai ketopi. Selamat, kalau tidak agak nyo arwah dah paje ini.

Kampong Paya Kecik tu teringek sebab disitu banyak pokok buah. Setiap kali banjir urang situ dulu kono pindah, macam urang kampung lompek jo. Dan kalau mereko pindah tontulah kek Mesojid Bukit Kepayang.

Dulu masjid bukit kepayang tu di ateh puncak bukik. Dikeliling mesojik banyak pokok buah, ado pokok rambai, ado pokok mato kucing, ado pokok lansek, pokok mutan dan pokok potai, Situ tanah wakaf jadi hak urang ramai, tak kisah sapo nak ambek. Sebonaunyo poko pokok buah ni ditanam di kawasan Perkuburan. Kalau urang meningge musin banjir, mako io ditaman di Bukit Kepayang, bukan Congeh.


Maso kami kecik kecik dulu jugo ado bolo ayam. Ado ayam tolu dan ayam daging. Makanan ayam jugo di boli diMentokab, jagung dalam guni. Ayam dibolo untuk dijue. Tolu pun di jue di kodai kami dibukit Kepayang.

Teringek cerito tontang Cino Boh Keh mati kono buno. Urang yang merompak tukeng jue ayam tu urang melayu. Dongau nyo kono tangkok tapi macam mano io tak kono gantung. Boh Keh tiap tiap hari naik besike cari ayam dikampong kampong. Belakang besike ado bakoi, dalam bakoi ado ayam. Macam macam ayam, ayam tuo, ayam jantan, ayam betino, Kalau urang nak jue ayam inyo boli. Kalau urang nak boli inyo jue.

Tapi satu hari inyo keluar tak balik balik. Risau keluargo inyo, dan repot kek polis. Sampai sehari dua, anak inyo report, urang cari, mako jumpo la mayat inyo, Dah busuk dalam somak. Duit jue ayam cino Boh Keh tu berapo ringgit sanget lah. Tapi ado jo urang sanguik membuno. Urang melayu pulo tu, ugamo islam…Kono tangkok juga akhir nyo

Teringek pulo tontang cino jue roti. Inyo naik besike dari mentokab setiap hari sampai ke temolo. Roti inyo buek sendiri dikodai inyo. Pakai bakau kayu api. Memang ingek cino ini ado punyo kodai kopi.

Satu hari Aba bawak paje ini pergi kodai kopi Cino ini. Maso itu bolum masuk sekolah lagi dan itu lah pertamo kali minum kek kodai kopi. Bukan macam budak sekatrang. Minum kek Coffee Bean. Kerano tak prona, jadi air kopi yang dihidangkan tidak dikacau. Toke cino tu tanyo, sodap tak.

"sodap",

Tapi dalam hati bertanyo ngapo cino ni buek kopi payik. Lope itu inyo ajau Eih , erh, san, see, Uu, Liu, Chip, Pak….


Lansung tak samo macam kopi kopi amak.

Selain dari itu maso kecik aba dulu prona bolo kambing. Tak banyak, tapi pado satu maso pronah mencapai bebole iku. Inyo ado buek kandang kambing. Kandang Kambing inyo buek sensurang. Abah memang buleh betukang, dan apo yang inyo nak buek inyo bule buek. Tukui bosi, paku, legaji, somo inyo ado. Bukan pinjam pinjam, Bagi inyo alat tukang tu ponting, Nak betukang mesti ado alat, misti ado hisab, mesti tahu tontang kayu. Sensurang pun bole buek, tapi kalau ado anak jantan tolong lagi baik.

Satelah siap kandang, inyo boli kambing betino. Dah ado kambing betino, itu dah cukuik. Kambing betino dah dalam kandang. Tapi aba ado rahsia. Cu Yunu kawan inyo. Cu Yunu, ayah Bari meniago daging dipasar. Selain dari itu inyo jugo masuk rato kampong nak boli kambing, krobau atau lombu. Antaro lombu dan krobau, urang awak lobeh ke krobau, katonyo krobau lobih sodap

"Cu, kalau Cu Yunu dapek kambing jantan bosau, antau kambing tu sini dulu yo."
Aba pakat dengan Cu Yunu supayo kambing itu di pinjamkan ke roban persinggahan sebolum disemoleh supayo dapek dibuek bako. Tugas mulio yang terakhir sebolom kono korban.

Ini sains urang dulu, ini genetik urang sulu, bako pinjaman pak yunu sementaro
kambing di bawak untuk di sembole. Bako basau di tinggeng eh kek roban kami. Jadi dengan itu kambing kami dapek bosau bosau belako. Tuhan maha kayo. Cu yunu ado anak nyo bernamo bari, anak bari kemudian nyo menjadi menantu Abah. Atan dan Nor.

Kambing yang lahir dari bako cu Yunu membosau. Bosau botoi. Takuik dek eh.
Kalau inyo begurau, inyo tandok eh, buleh jatuh kito. Budak sekolah tanjung lalang yang berjalan kaki nak balik batu satu takuik sangek ke kambing kami. Melinte inyo seborang jalan dan belari laju laju semaso dopan ruma, takuik kono tanduk.

Kambing itu paling suka melotakkan dou kaki nyo ke bau urang. Busuk nyo bukan main.

Cucu haji Yunu menjadi isteri Saharudin yang lobih dikenali dengan atan, anak Aba yang kelimo.

Abdulla Gindo

Ini adolah cerito hamba Allah bernamo Hj Abdullah Bagindo,atau rengkasnyo, Abdula Gindo. Cerito inyo disobuik sebagai orang kayo, pronah ado kedai pinggan mangkok bosau, di nombo 44 dibari lentang, pado tahun tigo pulohan.

Inyo terkone diseluro kualo semantan kerana ramahnyo dengan urang urang kampong. Urang urang yang datang kebandar maso itu disobuik akan akan junjung buah, beras, ayam bawak untuk datok Gindo , makanlah mereko di rumah datok tongah ari, dan sudah beli barang yang nak inyo baru orang kampong balik.

Itu rahsio inyo, baik dengan urang kampong. Urang tak sogan makan dirumah inyo, makan rumah inyo tak putui, dan inyo bab makan ni langsung takkan bekiro. Dongau ado cerito yang pado satu maso inyo balik keNegori dan dalam perjalanan inyo mengikek poruik, sampai di sanun, ingaek macam di sini, tapi bilo tak ado paneh botoi hati inyo. Urang lapau, marah botoi inyo.

Isterinya adalah hj umi kalsom tok bidan besar temerloh, kalau datang tepuk saja
bilik inyo.

"tak payah imbau imbau. abi jago urang,"

Bebidanlah inyo sampai keLobak, Chonor, Mentokab, baik sangaek dengan orang kampong, orang Sanggang, urang Belongu, rambutan langsek tak payah beboli boli,

"tempaik mak kawen singgoh, rumah tok gindo, eh kenai sanget, kedai 44 bari
lentang"

Taib, ayah abah pulo bekodai no 43 menjue kain.


Cerita datang

Abdula Gindo, mula tibo dari Negori, inyo teroi ke Kodah, dan belajau disekolah pondok diKodah. Inyo mungkin datang degan adek inyo dan diKodah mereko berpisa.

Jugo di sobuik yang cerito merajuk itu berpunco dari marah tok Gindo apobilo mendongau adek nyo menuli surek untuk mendapekkan duik sepuloh ringgit untuk Balek Negori.

"Urang nak ke Haji anak beran ak, inyo ynak balik negori, mintak duik ko adek betino."

Cerito marah ni mungkin menyebabkan adek beradik ni toruih perpisah dan tak dapek lagi dikosan. Inshaalah akan ketomu jo….

Adek nyo mungkin pergi ke siam sampai sekarang tak tahu dimano keturunan nya.

Chegu Seleman pronah cari tak jumpo semaso maktab perguruan Tanjung Malim.

Dalam tahun tujo pulohan ada guru ugama dalam TV RTM mengajau ugamo potang
potang, muko inyo macam chegu Seleman.

"Agaknyo itu lah sedaro kito yang hilang itu, sebiji macam aku jo" kato chegu Seleman.

Satelah abi mengaji di kedah disekolah pondok, inyo pun mengambek keputusan
untuk kePahang. Inyo bersamo isterinya Kalsom dan anaknyo Ali untuk ke Pahang.

Untuk pergi ke Pahang maso tu bukan nyo sonang, bukan ado kereto, jalan rayo pun maseh tak ado.

Jalan terpakso, mengikuit jalan kereto lombu, datang ditompang eh anak inyo ali
diataeh kereto lombu, kadang ate besike, kadang jalan gaja dan ate pematang
banjaran titiwangso.

"Ado masonyo, kami di jalan pematang torang ate bukit, banjaran titiwangsa,
kiri kanan curam, dan enta enta jalan rimao, jalan apo" kato nyang kalthom.

"oh ayah ali, tak dayo dek ambo dah ni, berontilah dulu, bilo nyang dah ponek.

"Hah yo lah" kato Abdula Gindo.

Inyo pun beronti, buek khemah, masak, makan minum, tidor, besok jalan lagi; bilo
kasut nya hancur, di ganti upeh pinang, yang di ikek dikaki.

Perjalanan mungkin mengabek maso setengah bulan.

Yo, jalan gajah, jalan kreta lembu, atas pematang titiwangsa berakit baru sampai ketemerloh dan torui menuju ke Bangau dimano Hassan sedaro inyo tingge.

Sedaro nyo temasuklah datuk merajo ayah pak mat, ayah pak dereh, haji hassan,
siapa adek beradek dengan hassan ayah pak chak.

Beberapo lamo kemudian inyo pinda ketepi sungai Pahang doket pokan sari
sekarang. Dulu Pokan Tmolo yang ase nyo some di topi sungai. Inyo niaogo situ,
tahun 1926, rumah topi sungai di hanyut dek air, Bah bosau Pahang. Banjir bosau, tapi rumah batu satu sudah siap, dokek rumah yang pronah duduk dek Hj Osman, suami wan Yam, amak cekgu Semiha.

Ado kedai pindahan lepas banjir dibangunan tapak bangunan Umno dekat masjid, dan Datuk Abdula Bagindo, pinda kesitu, dan satelah bari lintang siap inyo pinda
kebaris lintang kiro kiro pado tahun 32, sebab maso itu umi dah ado.

Wan Siti Zaharah nikah dengan Tok Tasir di rumah baru satu, dopan surau, dan
Tok Tasir jugo di sobuik sebagai hero jual goreng pisang dibandar Temerloh. Wan, maso kahwin dengan datuk Tasir, berjulang, dua ekor kerbau berolek tigo hari tigo malam orang duduk dirumah seminggu. Maklum lah urang kayo.

Datuk Gindo meningge diBatu Satu. Inyo maso itu ado duo rumah, satu
tempat rumah pak suman tingge, satu tompek wan tingge. Sebolum dio meningge dia posan agar masak di rumah pak suman, anak inyo, kerana mengikut pahaman, rumah orang yang meningge tidak bule berjamu atas kematian, Tak elok.

Anak anak nyo, Hj ALi, (Wan) Zaharah, Hajjah Hindon, Hj Osman, Hj Salleh, dan Hj
Sulaiman.

Renungan Pajeawak diwaktu Pagi

Sapo penyajak mistik Rumi? Ado sapo sapo pronah dongau namo Rumi, kek sekolah tak ade di ajau jadi mungkin urang kito tak pronah dongau. Tapi Rumi dibarat, terkone, bepulo buku inyo diterjemah ke pelbagai bahaso.

Namo Mowlana Jalaluddin Rumi bemaksud Cinta perjananan menakjubkan ke yang Maha Agung. Inyo dilahirkan pado taun 1207 dikalangan keluarga mualim mualim. Inyo diperakui sebagai penyajak genius dan menjadi pengasas Sufi Mawlawi, kumpulan mistik Ikhwan muslimim.

Maso inyo mati, pengikuik pelbagai ugama dan kepercayaan menyusung mayat nyo untuk dikebumikan.

Ini contoh terjemahan karya inyo.

Deyan tibo jo lagi, cando angin sepoi pagi,
Deyan bangun cando matoari - jole kek somo,
Deyan adolah matoari di musim pane, bukan musim lamo,
Bersamo deyan gumbira, gumbira ditaman inda,
Seribu merpati trobang mencari deyan dalam lagu nyo
Seribu chiak mendoru, seribu bayan menari menghalo deyan
Cerito tibonyo deyan dah sampai kek ikan ikan dilawik
Congkuok lawik menjana seribu ombak.

(Divan 1140:1-4)

Lapan ratui tahun kemudian, urang awak bertebar dimerato tompek, mencari tapi tak jumpo.
Jumpo tapi tak kone, Kone tapi tak ambek, sorang datang sorang pegi, tigo datang duo pegi, limo datang, satu pegi. Bilo pegi tak ade cerito elok, tak ade tingge bondo yang akan menyampai beratui tahun diakan datang.

Apo sebab nyo kita jadi begini. Apo jadi pado kehebatan yang prona di tingge dek urang dahulu kalo. Tak kan kito biar tanpo mencari jalan keluo. Dimano pergi kehebatan urang urang Islam.

Yang tingge hasad, dongki, taksub,
iri, bonci, sakit hati, male, bongkak
Yang tak abi abi.

Kalau dulu urang sogan kek urang awak. Sogan sebab urang awak berisi. Sogan sebab urang awak lebih cerodiek. Sebab dibanding dengan urang lain memang terserlah lobe nyo urang awak.

Tapi hari ini, indak indak jo le.

Ado kah kito biarkan, siLuncai trojun dengan labu labu nyo.

Urang awak dengan urang asli.


Ado urang awak dengan urang asli masuk hutan.

Lopeh itu, kojau dek rimau...
Urang awak ni codek lagi pado urang asli.
inyo pikir, rimau tu laju, bosau, lapau pulo
Langkah kito banding dengan langkah rimau
tontu lah kalah,
Jadi tak payah rugi tenago

"Tak guno kito lari do, dak kan lope do"

"Syaya bukan larik dari dia, syaya dapat poton cyek shudahlah...



Salah Faham

Sivapakiam guru bosau ABS
"Hassaaan, kasi Bakar ini suraat."

"Baik tuan,"

"Hassaan, apa pasal, Bakar tadak dapat itu surat"

"Tuan. kan suruh saya bakar surat itu"

"Ayoo ayooo yo, Kasi Bakar, bukan kasi bakaaaar,
Ayooo"

"Kiliong ko, inyo sala, awak jo sala." Kata inyo dalam hati.

Sodap Ikan tilan, Kelian

"Sodap ikan tilan,
prona kelian raso,
Sodap botoi,
Sodap pado Ayam lagi,
Mani daging inyo,
dek lomak lagi,
ihh,
sodap nyo,
terlior raso apak."

"Tapi
kalau ado gulai ayam
dengan gulai tilan,
kelian makan lah tilan tu,
apak makan ayam."

;) sajo seloro

Abah part 1.

Abah saurang yang boleh dikatokan urang yang belajau sendiri. Dio tak habi sekolah ronda pun, Sekolah Melayu darja 3, kemudian masuk Sekola Urang Putih inggo darja 2. Tetapi dio lobe pandai dari urang yang ado PhD. Sekurang kurang nyo begitu la, raso anak ini. Ini pandangan saurang anak kepado aya inyo.

Macam mano pun ayah sepatuiknyo totap tinggi dalam pandangan anak. Malang lah kalau itu pun tak dapek nak capai. Martabat saurang aya. Bagi anak ini, aya inyo ado PhD. Aya inyo kato tigo tauun dalam tahanan tu adolah universiti bagi inyo. Hiduik seteruinyo tak kan tak layak inyo dibagi PhD. Doktor Persuratan dari hal hal Kemanusioan.

"Ngapo Aba kono tahan?" anak ini tanyo.

Dio jawab, "Oh, Pak Itam Endut, kone ko dek waang, Pak Itam Endut? Pak Itam Endut nak kelambu, Aba jue kelambu di Pokan Sari. Aba jue macam macam kek Pokan Sari, tapi yang inyo nak tu Aba tak bagi. Nak Free, mano bule." Jawab inyo, selambo.

Maso dharurat dulu, urang yang disyaki membantu pihak komenes, di mintak lalu kedalam Pasar Lamo Temolo, disebola Bari Lintang. Masuk pintu kiri, jalan melalui pasar, sampai kehujung pasar. Dalam pasar itu ado beberapo tali baruit Urang Putih, “Urang Luor” tak tau sapo, yang mano satu, yang sah nyo pasti ado tali baruik yang tugas inyo membagi isyarat, sapo simpati dengan komenes, sapo tidak. Sapo Komenes sapo tidak. Yang dibagi isyarat, semaso keluar dipintu kanan, torui digari, bawak keruma pasung, di topi sungai. Bisoknyo pinda kelokap Mentakab. Lope tu hilang tak tau cerito.

Pagi itu Aba keluor agak pagi, jalan kaki besamo Mualim Derapar untuk kekodai. "Macam mano, harui kito lakukan supayo, Syarikatul Khairiah akan menjadi institusi pelajaran yang ulung diPahang, kato inyo. Supayo satu ari nanti, io bule mengeluorkan, enginaar, akitek, akautan, pentadbir, guru, ustad dan professor. Dalam pelbagai bidang tapi totap tau ugamo inyo, tanggung jawab inyo.." Aba, sebagai saurang yang tak abi sekola ronda tapi dizaman mudonya lagi bercito cito untuk menguba masyarakatnyo. Maso itu inyo masih bujang.

"Pagi tu, borek raso Aba nak kekodai, tapi laju jo langkah kaki melangka kekodai," Itu la kadok dan kadar, namo nyo. Memang kelaziman nyo ado kerojo atau tak ade kerojo inyo berjalan kaki pergi ke kodai.

Pagi itu, pagi las inyo bebas untuk bebberapo lamo kemudian. Inyo kono tahan tigo taun lobe, saperti beribu ribu pemudo seangkatan inyo dimaso itu. Pejuang Pejuang Tanah Air. Urang urang yang memperjudikan diri untuk kemerdekaan kito. Pejuang pejuang yang dicap sebagai pengane bilo negaro kito merdeka. THE UNSUNG HEROES. Ipoh, Bruas, Morib inyo dipindah dari satu tompek te tompek tahanan.

Inyo mungkin tak cerito abi, tapi inyo tak pronah marah atau dondam kek Pak Itam Enduk, yang menyebabkan inyo kono masuk tahanan. Dan Pak Itam Enduk, semaso tuo nyo, kek kodai abah lah topek singgah inyo, kalau kekodai. Inyo tingge diBukit Pak Silap. Ingek lagi misai bekaluk Pak itam Endut. Bonci joo tengok muko inyo, tapi abah sendiri kalau Pak Itam Enduk singgah, inyo belanjo teh.

"Jadi buek apo rugikan diri dengan marah, sedangkan abah sendiri tak mara." pikir anak ini.


Bagi inyo tahanan itu adolah universiti inyo. Macam macam ilmu inyo dapek disano.

"Ilmu apo abah belajau kek universiti Aba tu bah."

"Macam macam, betukang, menjahit pakaian, akaun, pengurusan, socioloji dan kemasyarakatan, politik, ilmu hiduik, ilmu sains, kejuruteraan, macam macamlah"

"Kalau di ulang semulo huduik ini, dan aba dapek pilehan, abah nak kono tahanan, ko tak nak kono tahan."

"Biar kono tahan,” kato inyo,

“Tu, urang tuo tu, jau abah tuo dari inyo, tapi, inyo tak kono tahan, tengok, tau dek waang kesengsaraan hiduik inyo tu. Oh, bia abah kono tahan."

Pronah dimuko dopan akhbar harian maso itu, Tajuk Berita, "Ramli Taib, masih di Tahan" macam urang ponting botoi.

Amak Pita kato, "Abah waang tu, inyo bagi ceramah kek darek, untuk urang dalam, sebab tu kono tangkok." Tak tau lah tu, Kalau iyo pun, maso itu memang gitu, Masyarakat dibagi duo, urang dalam, urang yang menyokong pejuang, urang luar yang makan gaji dengan urang putih. Kalau kito zaman itu pun, kito mungkin disebola urang dalam.

Duo hari sebolom itu ado ceramah, di darek, dokek Bengawan. Semoleh kobau, ucapan, demi ucapan, membakar semangek untuk bejuang, menontang inggeris. Amak dengan Pesah anak aruah Pak Hassan Tempayan ditugaskan untuk mengotok tong kalau datang aska upahan urang puteh.

“Nasib baik tak ade. “

Tak berapo lamo sesudah Aba keluo tahanan inyo mendirikan ruma tanggo dengan Halijah binti Tasir.

Mungkin itu lah yang dimaksudkan oleh abah "Dunio ini pentas, dan somo lelaki dan perempuan adolah pelakon ajo."